1Pe 2 | TPZ | STEP | Ivëh, ke eöm to tavus voh em o teß voon, köm se koe a ma taateß vaiu a hanan va pa miröß a meh teß, ke eöm se koe a ma taateß piuk, me a taateß mokoß rivon, me a taateß puhioß, me a vahutët a ma vahutët hat.

bAis 28:16

cSng 118:22

dAis 8:14

eAis 53:9

1 Peter 2

E Ieesuß A Vös Vih To Teß Me Non O Toßtoß

1 Ivëh, ke eöm to tavus voh em o teß voon, köm se koe a ma taateß vaiu a hanan va pa miröß a meh teß, ke eöm se koe a ma taateß piuk, me a taateß mokoß rivon, me a taateß puhioß, me a vahutët a ma vahutët hat. 2 Eöm to nat e nem pe koaß soneß to iu rakah non a hun sisiß. Eöm me se iu rakah nem, a kon o vavaasis vivihan tö. Manih po vavaasis pamëh, eöm se pu po toßtoß voon ne Sosoenën to heß a neöm, köm se teß vavih me nem e Sosoenën, 3 suk eöm to puta voh em, ko ep em pa ma vih pe Apuh, neß to nok voh manih peöm.

4 Eöm se nö maß manih pe Apuh Ieesuß, eß a “vös” vëh to teß me non o toßtoß. A napan va po oeh vëh to kokoe voh ne a vös pamëh, ivëhkëk, eß voh a vös ne Sosoenën to vateß, eß voh a vih oah rakah. 5 Eöm me to teß va nem manih po vös toßtoß, ivëh, ke eöm se tavus vamanih pa iuun pe Sosoenën no a Tuvuh Vasioß to eok. Ko teß va e nem manih po teß ësës heß vivihan to ësës ne a ma heß manuh pe Sosoenën. Ka manih pa ëhnan e Ieesuß Kristo, eöm se heß a ma heß peöm varih to vavaeö ne e Sosoenën. 6 O Puk pe Sosoenën to soe non pan,

“Eöß se vateß eoß pa vös po oeh manih Jerusalëm. ^{▼▼[Jerusalëm] manih po to Grik o ëhnan Jerusalëm to vatoe me non po ëhnan vëh, Saëon. Ep na “Saëon” manuh po Kölösöriß.}
A ma tah kurus se eok ne pa vös apuh pamëh,
to vih oah.
Ko teß varih to vaman ne poë,
ee to hikta se haraß vahat ne eah.” ^b
7 A vös pamëh to vih oah e non peöm a napan varih to vaman nem e Kristo, ko vavatet nem eah. Ivëhkëk, o Puk pe Sosoenën to sosoe suk non a napan varih to hikta vaman ne poë, ko heß tonun ne e Kristo. Eß to soe vamanih pan,

“A vös pamëh no a nap ekeok to koe voh, pare vi tavus in poë,
eß to tavus en a vös vamomoaan to toon vaeh non a iuun.” ^c
8 O Puk pe Sosoenën me to soe va e non manih pan,

“A vös pamëh se vavahan non pa napan,
ka vös pamëh se vavakuß e non pee.” ^d
Ee se kußkuß e ne, suk ee to hikta pënton a soe pe Sosoenën pare vatet. Ivëh, ne Sosoenën to vakuß suk raoe.

9 Ivëhkëk, eöm ne Sosoenën to vateß voh en peöm a ma napan rakah peß. Ke eöm teß va nem manih po teß ësës heß pe sunön, me eöm a napan vivihan peß, ko teß nem a ma napan rakah pe Sosoenën. Eß to vateß voh a neöm, marën a soe vatvus a ma tah vih ne Sosoenën to nok voh manih po toßtoß peöm. Eß to vaoe tavus këh voh a neöm a taateß popoen, köm tavus maß po maaka peß, a vih rakah. 10 Moaan voh eöm a napan akuk, ivëhkëk kuru, eöm a ma napan pe Sosoenën. Moaan voh eöm to hikta kon voh o ururuan pe Sosoenën, ivëhkëk kuru, eöm to kon em po ururuan peß.

Ea Se Teß Va No Manih Pa Nap Kiu Pe Sosoenën

11 Ma vakamöß peöß, eöm to teß nem manih po oeh vëh vamanih pa napan va pa meh muhin, to aun maß ko teß nem pa muhin vëh. Ivëh, köß hin vakis a neöm se varakah a ma iu hat varih, no a sionineöm to iu nok non, eß to vavapus me e non pa apeneöm. 12 A napan varih to hikta vaman ne e Ieesuß to teß vaßpeh e ne peöm, tomeß soe pan, eöm to nonok nem a hat. Ivëh, ke eöm se teß vavih nem pa matëëre, kee se ep a ma tah vih ne eöm to nonok nem, pare vasunön e Sosoenën po poen neß se hah amot maß pa vaßaus a neöm.

13 Eöm se kokoman nem a soe pe Apuh, ko teß nem paan o teß varih to vovoh ne pa ma kaman to teß ne manih po oeh vëh. Me a ma teß sunön to teß me ne o kikis, me a tasun, 14 eöm se vavatet nem a soe pa teß susun vëh, nee to vanö maß pa vakmis o teß varih to nonok vahat ne, ko kë nem a ëhnëëro teß varih to nonok vavih ne. 15 E Sosoenën to iu non pan, eöm se nonok varoe nem a ma taateß vih. Ivëh, köm se antoen nem a sunpip a rivoeero teß papön varih to hikta nat nee, to vavateen a ne neöm pa ma soe piuk. 16 Eöm se teß taihan rakah nem, ivëhkëk, eöm se nat nem koman nem pan, “Kuru ea to taihan, ko pah teß taihan e no pa nok a ma taateß hat.” Ahik. Eöm se teß va nem manih pa ma teß kikiu pe Sosoenën. 17 Eöm se vataare nem a taateß ta manih pa napan kurus, ko iu nem a ma kea me a ma vameneöm varih komön o kum pe Sosoenën. Paröm ta nem e Sosoenën, ko kë nem a teß sunön.

Ea Se Vatet A Taateß Pe Ieesuß Ko Teß A Ma Punis

18 Eöm a ma teß kikiu akuk, eöm se teß nem paan a ma torara peöm, ko ta nem raoe. Eß to hikta teß non pan, o teß varih to matop vavih varoe a no neöm, ivëhkëk, o teß me varih to nonok vahat a no neöm. 19 A teß to antoen e non pa kon kamis, suk a kiu vih neß to nonok non. Ivëhkëk, eß se keh koman non e Sosoenën, ko teß a punis, a, e Sosoenën to vaeö me non a tah pamëh. 20 Ee se keh rëp a neöm, suk eöm to nonok nem a taateß hat, ahikta tah ne Sosoenën se kë suk non a ëhnëëneöm, eöm se teß vatö e nem. Ivëhkëk, eöm se keh kon kamis suk a kiu vih nöm to nonok nem, eöm se teß vatö e nem, a, e Sosoenën to vaeö me non a tah pamëh.

21 E Sosoenën to vaoe voh en peöm pa nok a taateß pamëh, suk e Kristo to kon kamis marën a vaßaus a neöm. Eß to vataare voh en peöm pa taateß kon kamis, ke eöm se vatet, vamanih pa ö neß to nok vavoh. 22 O Puk pe Sosoenën to sosoe suk voh non a taateß kon kamis peß, ko soe pan,

“Eß to hikta nok voh tah hat,
me eß to hikta nat non pa piuk.” ^e
23 A napan to soe vavahat voh e Kristo, ivëhkëk, eß to hikta piun voh raoe. Eß to teß voh o kamis, ivëhkëk, eß to hikta iu miröß non raoe. Eß to vanoe ke voh e Sosoenën, pan eß se matop non poan, a teß va pa kiiki vatotoopin a ma tah kurus. 24 E Kristo to teen voh a ma hat pea ko han voh pa kuruse. Eß to nok va nën pan, ea se teß va no manih pa nap mët, ivëh, ka hikta se teß hah no paan o kikis va pa taateß hat, para taneo pa vatet varoe a taateß totoopin. Ee to ip vapißpiß rakah voh poë, ka manih po kamis vëh neß to teß voh, ea to teß toßtoß no kuru. 25 Eöm to teß vavoh e nem manih po sipsip to tapeat vakëkëh. Ivëhkëk, kuru eöm to hah em maß pa Teß Mamatop Sipsip vëh to matop vavih non a apeneöm.